不一樣的我終於考晒 midterm 喇，等到宜家有時間番o黎寫日記。考完試，可以盡玩呢個 Christmas 實在太 perfect 喇  雖然宜家變得好鬼怕凍，但係每年 Christmas 都係最開心o既，屋企次次都俾超多幸福我  o係冇 update 呢度o既幾個月時間，o係我身上發生o左好多好多以前望都唔敢望o既改變，但係竟然一一超額成真。呢刻，屈o左咁耐喇，我真係可以大叫："歐巧心絕對好有毅力o架！"  係時候總結一o下戰績 lu： - 冇乜點解，心血來潮，無端端o係吉日 7 月 14 日開始唸，不如減肥喇。
- 7 月 14 日正式開始，話開始就開始，就去o左買個電子磅。
- 磅完結果係 143 磅，顛峰之作 腰圍就更加係恐怖，30 喎大佬！
- 開始每日做運動 ( 每日做 sit-up，跑 20 分鐘 6.7 km/hr 而途中要o抖 5 分鐘 )，食番正常 d ( 8 成飽 )。
- 慢慢增加運動量 ( 每日做 sit-up，跑 40 分鐘途中都係要o抖，夜晚自己跳o下舞 )。
- 下定決心每餐食完唔坐，睇 d 醫學話最好企 20 分鐘，咁我就決心企 45 分鐘。
- 8 月 1 日，135 磅，已經好感動，你o地明唔明？
- 決心戒食最愛o既 tea ( 生果，奶，高纖餅除外 )
- 再跑耐 d ( 跑 45 分鐘，中途唔使o抖，仲要 8.2 km/hr )
- 戒即食麵，所有炸o野，汁撈飯，燒味，例湯，河粉，cheese cake，雪糕，肥肉，皮…… 所有我人生最大樂趣o既o野，真係好唔開心，你o地冇試過係唔會知有幾唔開心。
- 9 月 4 日開學，127 磅，腰圍 28。
- 冇時間，1 個星期盡量都跑 1 至 2 次。
- 每日番 UST 都係自備 lunch，倒如：
(a) 麥包夾 fat-free cheese / 蟹柳 / tuna fish / 獅子狗
(b) 7 仔低脂白汁 tuna 三文治 ( 貪佢標明係 236 Kcal )
(c) 山崎法包 2/3 個，剩餘 1/3 可做早餐
- 10 月 1 日，122 磅，腰圍 27。
- 食完飯企得再耐 d ，at least 1 個鐘。
- 11 月 1 日，115 磅 ( 已經超越我從來奢望o既 120 磅 )。
- 所有衫都唔稱身，唔係串，但其實好浪費，我減唔係為靚衫。
- 12 月 1 日，109 磅，腰圍 25。
- 12 月 19 日，沖完涼，暈低o係浴室，黑色一片。
- 12 月 20 日，沖完涼，又暈低，20 分鐘後起到身。
- 應承了 Samsam，keep 住 105 磅，唔好再瘦落去 ( 雖然今日磅到 103.5 磅
 )
 我o係度唸，呢段時間冇見過我o既應該少少都有 d 驚訝，話晒都叫做減o左 40 磅。我記得之前某人叫我唔減 30 磅都最好減 20 磅，今日，我用每日o既努力不懈，自己減o左 40 磅咁多，雖然當中o既唔開心有好多，想過好多次放棄，亦迷失過自己，點解我唔可以放開懷抱咁食o野。
直至今日，食o野依然係我人生最大最大o既滿足。只要食，我就會好開心，好快樂。當中，有太多親情牽涉在內。 老竇由細錫到我大，仲係錫到，幼稚園時代，每日去 A-One 買最鍾意o既腸仔包 + 馬仔俾我做早餐；中學時代，每朝車我番學，例牌兩個去五星茶餐廳食早餐，我 10 年如 1 日，一定係 "三式早餐"：沙嗲牛肉 + 五香肉丁 + 雪菜肉絲配出前一丁 + 熱朱。就算冇時間去五星，都一定去 M 記買個早餐俾我o係學校食。放o左學，屋企通常都有定 d 西餅蛋糕等緊我，然後老竇晚飯前周不時去豪華買 d 新鮮熱辣到爆o既蛋撻老婆餅，或者車仔麵俾我，食完又即刻開飯。 環境好，屋企一直都好鍾意全家周圍食，幾遠都 "jar" 車去，細細個已經好多地方食暈晒，平有平食，貴有貴食，邊度o既鮑魚糖心得o黎唔掠水 (ans:世貿會所)、蘇眉最嫩滑 (ans:西苑) 、生蠔最新鮮 (ans:馬會)、拖羅最入口即溶兼丁咁 dur 筋都冇 (ans:見城)、煲仔飯正到無朋友 (ans:西環坤記，全港唯一火爐煲完再用炭爐)、蛋捲香到要買就 8 個月打電話訂 (ans:德成號) 總之，冇食過勝香園o既 PERFECT "茄牛通"，同埋正到啞o既"檸麥脆脆"
冇食過德成號o既超勁蛋香 + 超多層 + 但都可以咁鬆脆o既蛋捲
冇食過佐敦澳洲牛奶公司日賣過千o既香滑得離奇o既炒蛋 + 鬆軟油多
冇食過北角街市入面，全港第一明星大排檔東寶小館o既風沙雞
冇食過上環蛇王芬 (有幾勁唔使我講啦出名到咁) o既勁香焚酒o既油臘腸
冇食過旺角小巴街金華冰廳每日排完又排等出爐o既至鬆軟菠羅包
呢個至勁，冇食過中環蓮香樓 (呢個唔識，好打有限) o既八寶鴨同所有地方拍馬都追唔上o既蓮蓉包 唔算係香港人！！！貴o既唔講，但係唔貴o個 d 冇食過o既，真係一定要去試，一次都要，我 strongly recommend 人格擔保 P.S. 我都唔輸蝕，聽晚做節我拍板，訂o左九龍城順記，去打冷，o個度 d 蠔餅絕對 No.1，就算最出名o既創發都唔夠o黎。不過，少食多滋味啦，唔會食過 quota o既  | 
