| 比三年零八個月還要多一個月的大學歲月 (09/03-05/07)
放左兩個禮拜假,而家先肯鼓起勇氣去回顧返呢三年零八個月既往事
以下內容既篇幅比較長,希望朋友們可以耐心閱讀
以下內容算係出自本人既真心話,所以有少許內容大家睇完之後可能會覺得唔係太舒服,希望大家見
諒
我的三年零八個月......好像香港被日軍侵佔的三年零八個月......都是一場惡夢
我的大學生活
我的大學生活可以算係呢三年零八個月裏最糟糕既一環
第一年既HD civil: 由於AL中文唔合格,所以被迫報讀HD......果陣時揀讀HD civil係因為自己本身對civil(environmental)幾有興趣
讀到sem 2中段,開始有少少煩惱......1. 自己係班內成績唔係太好,驚萬一讀完兩年HD之後升唔到degree咁咪大鑊 2. 就算俾我升到degree都未必係一件好事...因為聽人講將來civil既前景比較差,(事實上有好多大型基建已經完成,到我出山既時候一定少左好多發 展機會)......所以為左到時兩頭唔到岸,最後決定sem 2中段withdraw呢科,然後再考多次AL...若成功既話,係jupas度起碼仲有唔少科俾自己選擇
咁就浪費左差唔多一年既HD生活...不過為左自己既前途,唯有咁樣下決定
最後,中文pass左, 同埋AL pure
maths升左一個grade......終於讀到degree,當然開心...不過其實可以俾我揀而自己有興趣既科目唔係好多(大部分HKU,CU, UST既subject,又或者浸大既新聞系我都fulfill唔到個requirement)
最後決定入讀IMT
(Internet & Multimedia Technologies)...原因係自己對video, animation方面都幾有興趣
可惜,呢個決定卻令到自己步進三年人生既黑暗期
可能係我太看輕Internet
& Multimedia Technologies表面上既definition
可能係我太看輕寫program既difficulty
其實自己報讀呢科之前都估到有部分內容未必係自己既興趣,同埋知道有時要寫下program
另外知道final year會有三個stream俾我地揀,1.internet, 2.multimedia,
3.e-commerce......到時就可以俾我選擇最有興趣既multimedia,或者其次既e-commerce
可能自己係心理上既準備已經比部分人好,起碼自己唔會當呢科係水泡科先啦
但係,可惜到最後我既「如意算盤」完完全全被摧毀...一年又一年既希望,變成一年又一年既失望
真係諗唔到有d科可以係同Internet & Multimedia
Technologies扯上任何關係
真係估唔到好多時都要讀d令人發悶既theory
真係估唔到要寫咁多program...有好多都係要靠自學...有好多都好難寫...有時用上一日既時間都好似無咩進度
真係估到有好多professor都幾廢下......正所謂臭罌出臭草,佢地往往另課堂變得更加無意義......呢三年裏有好幾個professor我都覺得唔需要去尊重,當時索性走左佢地大部分既課堂
第一年
第一年選擇住hall,諗住可以過下輕鬆,自由自在既生活
呢一年家祈成為我既roommate
係呢度要同佢講聲對唔住......或者大家為左呢科都受到一定程度既痛苦,壓力...大家既心情好似比較沈重,所以令到大家既相處不是十分融洽......又或者自己本身唔係太習慣兩個人既生活,返到房成日都想自己靜下來
所以住hall既生活唔係過得太愉快......當然中間都有唔少開心既片段值得回味...最開心既時刻應該係
半夜時分廿幾,三十個hall友一齊走出去common room睇波既情景...那時熱鬧既氣氛絕不比落bar遜色
比較難忘既事:
1. sem 1就已經fail左java programming呢一科,之後重要俾SM Lau叫上office訓話一番
2. 試過幾次大家係hall度趕programming既assignment,好辛苦......有一次Yammy終於撐唔住,做做下喊左出黎...... 可以想像到program呢樣野難起上黎可以係好恐佈...又或者咁講,從未寫過program既人係難以想像到箇中既慘痛
第二年
比較難忘既事:
1. 呢一年先可以做返自己感興趣既野......同alvin, george去蓮香樓,泰昌餅家等地進行偉大既拍攝工作
自己就用3d max做左一個淨係對手識得郁既character...哈哈,諗返都覺得幾攪笑...無辦法啦,之前無學過3d max,突然要係短時間學識晒最基本既野實有一定既難度
第三年
比較難忘既事:
1. 寫program整個mastermind出黎...呢個可以話係三年入面(唔計FYP,唔計普通assignment)唯一一個由自己一手一腳完成既 programming
project......呢份算係最俾心機既功課...重記得最尾一日做到第二朝8:00先做完
2. 要數三年最難忘既苦事,一定係final year project......整件事又係荒謬到極
不過向大家訴苦之前,首先要同andy, alvin講聲對唔住先
事實上果陣時自己係prefer
individual...因為發覺之前既group
project,同自己既groupmate合作得唔係太好...好多時一group人入面都會有唔同既level of programming skill(自己當然係比較差既一員),同埋最慘既係programming並唔同一般既project可以派餅咁平分每個人既workload...所 以programming skill較好既workload往往比programming skill較差既大得多......呢種很難用三言兩語就可以解決到既不公平好容易會形成不滿或者內疚既心情......到最後大家合作既氣氛只會變差, 形成各自為政既局面
所以為左避免再次發生不愉快既事件,果陣時決定揀individual既topic
另外其實當初既決定係想為自己爭氣......經過兩年既失敗,自己唔想最後既一年都要在失敗中渡過,所以希望憑一己之力,可以係FYP度做到少少成績出黎
我諗andy, alvin你地而家知道點解當時我無主動搵 michael small,
newman去挽回
當時我都唔知點解釋好,怕事情越描越黑......所以到而家完晒個FYP先至係呢度同你地解釋返......真係唔好意思...希望你地會明白我當初既決定
好啦,開始要講返呢個FYP所發生既荒謬事情
可能我係summer無上到佢地既trainning course(要返summer internship,仲邊鬼得閒上堂),所以係Raymond Lee眼中根本無當過我存在...之後我要主動問佢,或者其他人話俾我聽,先知道佢稍後會有僅餘既兩次meeting要開
去到十月, Raymond
Lee將會離開poly,所以佢好快已經將個波推左俾另外一個人Eddie,成為我既臨時supervisor
一開始見Eddie,真係有少少驚...佢係咁俾壓力我,叫我做快d...但實質都幫唔到我,因為佢成日講野都跳step,好似覺得我每樣basic knowledge都識...事實上我係讀IMT,有好多佢地expect既野我都唔知...所以有好多時都聽到無所適從......最慘既係佢本身已經 唔係poly,而係外面返工...攪到想約佢都變得艱難......有好幾次約左見佢,但唔見人,到我主動打電話俾佢,佢先至話唔得閒
實在太過份,自己要求多多,但係唔肯蒲頭教我......你估我係神咩,係就唔駛你做我supervisor啦
去到十一月,因為某些原因而要轉topic, 由IJade tourist guide變做 indoor positioning......令到之前所做既research一切化為烏有......所以要靠自己上網搵paper睇
去到一月既intern
present, 自己只不過係掌握到indoor
positioning既theory......而同一時間Eddie可能嫌我太煩,抽唔到時間應酬我,所以佢委派左另外一個人Edward,成為我既第二個I既臨時supervisor
第一次見Edward,感覺算係唔錯...起碼佢知道我既能力去到邊...起碼佢知道淨返一個sem既時間...所以對自己既要求唔算高......果陣時先稍為安定落黎
但可惜佢原來都好似Eddie係個大忙人,能夠搵到佢既機會都係好少
之後多數既時間都係through
email問佢野...但有好多時佢都答唔到我真正想要既答案...莫非佢想我再碰下釘先,定抑或係覺得我每樣basic knowledge都識,所以唔駛講咁明???
俾佢搓跎左個半月既時間後,發覺有好多最根本既問題仍然未解決到
所以去到三月,自係毫無選擇下被迫放棄pocket PC,改用notebook...唉又要重新研究過......發生呢件事之後先至令自己醒覺,知道靠呢班所謂既supervisor都係多餘...所以往後既時間都係靠自己去解決問題
去到四月,project既進度先至有第一次既明朗化......而最後michael small做左我既final supervisor,亦即係靠佢黎決定我個project有咩grade
去到五月,經過presentation and demonstration,我既FYP生涯終於可以劃上句號
其實要講晒成年做FYP既痛苦經歷,可能要講足成日先講完......淨係supervisor既數次變更就已經令我覺得非常無奈
唉,終於都寫完呢三年所發生既事,總括黎講係悲多過喜
永遠都忘記唔到呢三年所俾我既疤痕...就好似受到三年零八個月戰爭折磨既平民百姓所遺留既疤痕,無論係肉體上,抑或係心靈上都受到一定程度既傷害
雖然IMT俾我好多挫敗感,但我無後悔到揀呢一科,事實上當初可以俾我選擇既科目唔係太多
要怪就怪當初點解唔盡力去考好個AL
不過諗返有d野可能係命中註定
唔講咁多啦,因為之前係唔同既post入面都已經交代左好多IMT既辛酸......只希望藉住呢個假期好好俾自己療傷,休息
我的將來(事業方面)
既然讀得呢科,就唔會預左前途無可限量,亦唔會預左搵好多錢,更何況自己唔會做返呢行...現在對於我黎講,興趣係最緊要......因為呢三年深深體會到自己係「被迫」既狀態下生活係非常痛苦既一件事
所以唔希望到時每日一返工就想放假...咁樣迫自己返工其實都幾辛苦,因為一個月有三十日,為的可能是每個月頭既出糧,為的可能是出糧後幾日間片刻即逝既快樂
唉,只可惜自己既興趣比較狹窄......事實上市場係呢方面既需求又唔係大,而且我係呢方面既technical skill頂多只可以話係fulfill到最basic既requirement......究竟自己既競爭力會有幾大?
去完台灣之後就要認真去諗下呢個問題......要諗下自己有冇其他出路,其他興趣......因為其實係video上要有高既technical skill,某程度上係要靠金錢黎堆砌出黎...(e.g.淨係專業既DV機都要成過萬一部...如果無錢買apple notebook既話,又點識用final cut pro呀)
興趣呢樣野當然賣唔到錢...但希望我仍可以憑決心堅持到底,直至戰敗投降為止
我的家庭
可能係香港有好多家庭係97-07呢十年裏好似坐緊過山車...一開始有好多不愉快既經歷,e.g.經濟不景氣,樓市下跌造成負資產,股市下跌,失業率高企......幸好最近呢三年香港似有復蘇迹象,有好多家庭都能夠康復,重新振作起來
講返自己既家庭,係呢十年裏,好聽d就係穩定,難聽d就係直到現在情況同十年前差唔多,都係咁「霉」
其實有時都唔想諗到咁消極,但係當自己事實係生活上無一樣野係值得安慰既時候,就不自覺地經常諗埋d負面野
有時重會諗點解個細妹會係我8年後先至生出黎...一間唔夠400呎既公屋單位,本身環境已經唔係好,再加多佢一個就更加加重家庭既負擔
最慘既係佢既性格...無隔幾耐就黎煩你,激你......唉,不過有時都唔怨得咁多,可能係家庭環境造成,可能我都要負少少責任......或者當係前世欠左佢
我的健康,我的生命
呢三年既身體狀況確實比以前差左少少......尤其是自己既心臟...重記得year 2行返屋企既時候突然覺得心口好痛...以為自己咁就「玩完」...好彩捱過一陣後就無事......所以之後去做下body check...又發現唔到有咩問題喎......可能係自己已經患上少少心理上既毛病,導致有時緊張既時候心臟亦會出現毛病
大學最後既兩年返左黎屋企住......唔知點解有時對眼會好乾,同埋有少少痛...攪到眨眼既次數比正常人頻密......真係唔知點解...我又唔係 太夜訓......有時重慘,訓得太過晏反而令對眼更加辛苦,仲會攪到頭都痛埋......仲未知道原因所在,只希望可以藉著呢排放假好好俾對眼調整,休息一下
重記得year 3 做完mastermind既assignment......果日下午照常係大埔墟火車站等車返poly,可能係果個禮拜實在趕得太辛苦,最尾一日重要做到通宵,再加上受到接近三年心靈上既蠶食,令到個人身心皆疲......見到火車將至既時候,腦海裏突然之間有一,兩秒諗緊:不如就咁跳落去一了百了......好彩好快已經醒覺無做到......之後諗返都覺得猶有餘悸 雖然呢三年係人生既最低谷,但慶幸還未痛苦到想過求死
我的愛情
上到大學呢四年係愛情上仍然係白紙一張,可能係受到以上種種事情既影響,令到自己已經無心情係呢方面花上時間......有些朋友會好直接咁問我: 你係某方面既取向係咪出現問題?......有時聽到都覺得好無奈,唔知佢地係咪出於關心
當然我好有信心自己係呢方面既取向絕對係無問題......起碼year1既時候都曾經對一個女仔產生好感
但係點解係呢方面一直都唔積極?
可能係有太多顧慮
覺得自己已經有好多煩惱...有好多其他比較重要既問題等住我去逐一解決
緊絀既財政狀況令到連照顧自己既生活已經出現一定困難...更何況要照顧埋另一半?
覺得自己重未成熟,擔心能否做一個稱職既男朋友
以前讀中學既時候,覺得愛情係相當重要...但係受到呢三年咁多事情既影響後,覺得愛情相對上只不過係微不足道
當然愛情係我人生中仍然佔重要既一席位,起碼每逢到情人節既時候總會有些失落既感覺......但而家已經睇化晒...隨緣啦,無需強求
或者從另外一個角度去睇,自己應該係迎接將來既一段愛情之前好好咁裝備一下先......其實愛情只不過係一種甜品,人應該要設法攪好主菜呢一環,待吸收 最基本既營養後,先至再去諗享受甜品......要記住,唔食甜品仍然可以過活,相反淨食甜品係不可行的,尤其是身處香港既男性,患糖尿病既機會比女性要 高好多
最後要多謝她...呢三年裏唯一一個欣賞自己既她...多謝她令到自己係生命中挽回一點自信
我要多謝的人
係呢度竟然要多謝梁靜茹,孫燕姿,張韶涵 & FIR......多得佢地既音樂我先至可以係呢三年一片愁雲慘霧裏找到一點光芒
而家每晚都會留意fish既blog...她彷彿係我生命中唯一既安慰......所以要再次多謝她
總結
雖然呢三年零八個月帶俾我好多痛苦,但自己希望可以將佢視之為人生既磨練
就好似當發覺自己連續返十日promoter,然後每日返十二個鐘,重可以頂得順既時候,咁往後返工既日子就已經唔需要太過擔心
另外,係呢段時期當中亦有好多值得反思既地方
就好似做FYP,學識點樣從一個接一個既失望,無助,惶恐,失敗...中振作起來
另外,有d野已經睇化左...已經唔再苛求自己將來可以搵到幾多錢,或者買樓買車......只求搵到自己興趣,然後盡量做好呢份工......可能係受 到太多因素影響...1.自己平庸既knowledge&technical skill, 2.家庭環境, 3.自己既身體狀況...再加上自己一向欠運(係呢三年同我比較熟既朋友仔就會更加清楚呢一點...唉,最近買左唔夠一個月既DVD writer好似又壞左)......所以種種因素迫使自己形成趨向順其自然,不太強求既心態
有一樣野好想係呢一年內達成,就係搬出去租屋住......知道自己唔會搵到好多錢,但仍然希望儲到僅有既積蓄去support呢個計劃......我覺得呢個決定對大家黎講都係一件好事
對我黎講,搬出去住可以訓練獨立...學識照顧自己
可以享受自己既私人時間,私人空間
事實上轉換一下環境可以令自己既人生過得精彩些,無咁苦悶......就好似自己鍾意食野,但係呢十年來樓下只係得一間大家樂同埋一個大排檔比較o岩自己口味,而且款式經常都係大同少異...老實講食得多都覺得悶啦
.
.
.
對於家姐,細妹黎講,佢地終於可以有一間女仔房...佢地可以係房間做些佈置,添些裝飾,然後又可以善用呢個較為充裕既空間去擺個衣櫃,掛上佢地各自喜愛既服裝
對於細妹黎講,更加係一件好事...我搬走既話佢就唔駛晚晚訓廳,可以返入房同家姐一齊訓
另外佢可以將電腦台搬入房...到時要做功課,溫書既時候就唔駛係廳度俾我地同部電視機騷擾住......話晒佢就黎升中四,係學業上開始進入關鍵既時刻...所以一個寧靜既環境對佢黎講係相當重要
.
.
.
總括黎講,搬出去住一定會令整體開支有所增加,但係我認為呢個方法係利多於弊,所以希望呢個大計盡快可以實現到
用左差唔多成日時間先打完成篇文章,希望大家睇完之後對我既了解會有所增加,而且可以從中啟發到大家既人生 希望自己可以慢慢地從傷痛中康復過來...然後重過積極,有盼望既生活
最後要多謝大家耐心既閱讀
|
夜晚出去尖咀同一班中學同學聚舊......食完飯之後仲同佢地落吧飲野
放假既日子有時都幾無聊
不過呢度不失為一個
好奇怪
有