tswongsir's Xanga

Âà¤F Xanga

Fri, 03 Aug 2007 13:37:14 GMT

這個月剛轉了網頁寄存服務供應商，現在可以自己 host 番自己的日記，所以從今天開始會改用 http://www.wong-sir.com/diary。

·l¤âÄê¸}

Mon, 30 Jul 2007 05:28:22 GMT

連續個多星期都三十幾度高溫，家裡廿四小時冷氣開放，結果就係右手中指、左腳腳趾公、腳跟及右腳腳跟嚴重爆拆，幾條都成個 cm 長，一至兩個 mm 闊，十足冬天一樣咁嚴重，最弊就係影響埋跑步及打羽毛球。星期六朝二弟叫埋去打羽毛球，一拎起塊拍，隻中指已經有小小痛，打左一陣直情爆埋，連隻右腳腳都係，搞到走動時也要就住就住。昨晚練跑，大圍來回體院，只係慢慢跑下，唔想再整爆隻腳趾公同腳跟，因為已經明顯好緊。

今日返學校練跑，都算幾人齊，只欠 B Grade Ｄ隊員，見酷熱天氣警告仍然生效，所以只跑了一個半八字圈，之後一齊做基本功及體能練習。原本打算今日順便執 P.E. Office，但係見大家咁有心，所以就順便執執佢地Ｄ基本功，所以間房Ｄ野就乜都無執到，睇怕明日要再返過去執野。

呢幾日除左Ｄ手腳外，個股都有少少損傷，星期五傷勢較為嚴重，不過好彩到目前為止，都只係流左少少血，而且Ｄ傷勢今日已經有好轉既跡像，希望過多一兩日可以完全康復，而且慢慢坐大。

«·s½m¶]

Thu, 26 Jul 2007 14:14:22 GMT

今個星期日開始已經重新練番跑，見大家都咁勤力，自己都唔好意思懶。

星期日晚大圍來回馬場盡頭，好耐無跑過咁長，志在跑下，24:30 左右去到馬場盡頭，時間算唔錯，但係回程去到消防局就真係開始無力，Jog 埋番去以 52 分幾完成。星期二在 JSC 練 intervals，三個圈 100 米快，100 米慢熱身之後，便是三組的 3 個圈（第六線，440 米）均速跑，第一組：1:42, 1:45, 1:46；第二組：1:41, 1:44, 1:42；第三組：1:45 之後右腳小腿抽了一下，唯有停低休息，唔想抽左出黎影響星期四的練習。星期四晚在九龍仔跑八字圈，學生跑 3 圈快 + 1 圈 jog，我自己跑 2 + 1，JSC members 跑 4 至 6 個圈均速。第一圈 6:06，第二圈 6:30，12:36 跑完兩個圈（約 2 英哩），比以前慢左約分半鐘，希望在十月底前可以跑得番 11:30 至 12:00 之內，然後十一月就開始加到 3 + 1，為來年的教師長跑比賽再作準備。

今個星期亦開始實習，不過一開始就先交了少少實習費，星期二至買，星期三就已經跌左 4 毫子落地。雖然已經認定了幾匹阿爺馬房的千里馬，只可惜進修得太遲，幾匹千里馬都已經跑得又遠又快，而家至追又驚谷爆肺，而且萬一佢地突然掉番轉頭跑就除時會比佢地踩鬼死，所以唯有試一試另一個品種，見佢連續兩個星期都進展得幾好，以為搏佢遲早進身國產大笨象，不過呢兩日佢又突然變左隻大笨豬，真係比佢玩死。原來騎牛搵馬真係幾難，不過騎住隻象都唔算容易，不經不覺都騎左隻大笨象有三五七年，雖然這幾年間佢都行得穩穩陣陣，磅數亦有增長，但係始終覺佢行慢左，唔知係年紀開始大還是身體太過發福，比Ｄ千里馬越拋越遠，呢幾日重掉番轉頭走，都唔知重要過幾多日先至肯向番前跑。好彩唔係趕時間，亦趁機會看看還有沒有其他千里馬。

«·s²z°]

Wed, 25 Jul 2007 11:07:21 GMT

隱居了近兩個星期，都是在家裡看書及做研究。到目前為止，已經把全套新舊約全書的廣東話版本聽完，有些章節更是聽上了十幾次，現在再從頭細心聽過，遲Ｄ再嘗試看看原文。

經過我們體育部的投資理財顧問點醒之後，簡直是一言驚醒夢中人，從來只顧做做做，一向也沒有考慮過如何理財的問題，所以就一直也未能積累到多少財富，成日都以為退休後靠份公積金，慳慳地就可以同老婆過埋下半世，點知計計下原來係點都唔夠過世，唯有趁放暑假積極進修，學習一下從來沒有學過的東西。所以這兩個星期都在閉門苦讀林森池的《平民資本家，2007》和《証卷分析實踐，2005），同時也在網上搜搜尋尋，學人研究一下數字。

看完這兩本書之後，果然獲益良多，不但能夠了解到香港、內地及歐美等地的金融發展歷程，亦能夠認識到投資的正確態度。閉門苦讀了兩個星期，至少總結到以下幾點：

長線投資必定勝過短線炒賣（股王畢菲德就是最佳例子）。
投資越早開始越好。
不要少看開頭少少的本金，在長時間（數十年）及複利息計算底下，本利和可以滾存到過百倍。
平均成本法可以免卻終日望住個市做人，更無需理會何時風高浪急。
分散投資不如集中投資幾隻好的貨色。
最重要及最關鍵反而是要物色到好的千里馬。
千里馬跑累了或出現腳患的時候，就要考慮換馬。
存錢入銀行倒不如買該銀行的股票，通常所得的利息會高些。
基金的管理費昂貴，所以利息要有十厘或以上才值得考慮。
買樓不如買地產股。
比較起定期存款、基金和地產，股票的回報一般較高和較靈活。

總結了以上各點，目前最重要是快Ｄ搞掂層樓，希望在一兩年內改住村屋或換居屋，唔使再供樓，更唔使係咁送錢比銀行使，反而可以用番個筆錢買番銀行Ｄ股票，做番佢老細轉頭。可惜遲了兩年進修，否則今天已經拖著 941 和 2628 散步了。

¤TÅK + ¨âÅK

Tue, 17 Jul 2007 11:02:48 GMT

今朝訓到十點幾，養足精神，跟住睇下書，林森池的《平民資本家》，上下投資課。之後帶亞仔入石門浸大上體院的游水堂，然後去城大打羽毛球，再去 JSC 跑步，兩父子分別玩足三鐵跟兩鐵，所以而家謝哂。今晚跑得都幾好，三個圈 100 快 100 慢熱身，跟住就做左四組 3 圈（約 1320 米），平均每圈（440 米）為 1:45-1:47（第一組：1:42, 1:47: 1:45；第二組：1:43, 1:46, 1:45；第三組：1:45, 1:47, 1:46；第四組：1:45, 1:45, 1:33），每組都被周記在後面迫住跑，不過盡量放鬆跑自己，最後一圈試下再加快，做到 1:33 都算滿意。明天阿仔去 camp，可以休息一天。

Monday, July 16, 2007

Mon, 16 Jul 2007 10:16:30 GMT

沙田回歸跑照片：

照片簿

¨F¥Ð¦^Âk¶]

Sun, 15 Jul 2007 10:35:22 GMT

今朝一早就趕去沙田運動場看沙田節 10K 長跑慶回歸比賽，原先打算看完起跑後便坐巴士返大圍，再轉馬鐵去馬鞍山運動場看過終點的場面，點知回大圍那邊竟然封路，只好由源和路運動場慢跑去新城市廣場，搭東鐵回大圍再轉馬鐵去馬鞍山運動場，好彩都趕得切看大部分人過終點。首先要恭喜浩文在青年組取得第三名，另外當然要多謝卜大狀請大家飲茶，可算出錢出力，功德無量。

¤Ü¦~¤@»E

Sat, 14 Jul 2007 11:16:03 GMT

剛從大尾篤ＢＢＱ回來，今晚共約了七至八個師範同學在其中一人家裡聚舊，估唔到咁就成廿幾年，大家有傾有講，Ｄ仔女雖然都是第一次見面，但係很容易就玩埋一堆，希望由這次開始，可以逐漸約番齊其他同屆的 PE 同學一齊聚會，現在已暫定聖誕節再聚一次，而且由我負責做番個網頁，方便大家日後繼續聯絡。人過中年，朋友便會越來越少，正所謂去一個少一個，真係要好好珍惜！

ªø¶]¤Î¨¬²y°V½mÀç

Sat, 14 Jul 2007 01:20:35 GMT

無寫日記很多日，因為在過去的個幾星期實在太忙、太多事。上個星期三、四、五，和長跑隊及足球隊一齊去鯉魚門渡假村宿營，和楊仔兩個人帶住四十幾人，真係幾大責任，好彩都總算人口平安。講真，這類活動我絕對不會主動搞，過程煩，責任大，手續多，雖然必定玩得很開心，但係秤來秤去都是覺得搞唔過。不過，每次都是由高班的隊員做聯絡、申請、籌備等工作，再由楊仔總其成，我只是幫幫忙做些濕碎野，所以就無乜所謂。其實每次都咁成功，真係要多謝高班的隊員和楊仔，因為每次的安排都非常之有質素，充分顯示出我們學生的組織及領導能力。

今次去 camp 都算幾順利，那幾天的天氣認真差，經常突然間落狗屎咁大的雨，但係每當我們進行戶外活動（練習、燒烤）的時候，都幾乎是沒有下雨，所以都算係天公造美。第一日是星期三，約定十二點半在筲萁灣地鐵站集合，絕大部分人都準時出現，剩下幾個也在預定時間的十五分鐘內到齊，都算係咁。部分人被分派去買汽水、杯麵、薯片等小食，其餘人先跟楊仔入營辦手續，我就帶埋阿仔跟埋其他人去超級市場買野食。

買齊野後，原來都幾壯觀，剩係汽水都已經嚇死人，四十幾支兩公升汽水，上的士時就好像把一碌碌的炮彈放進車尾箱，還有百幾個杯麵，幾十包薯片，兩箱餅乾，真係好似打仗咁，總共都用左三架的士才運得哂Ｄ野上去。臨上車時，又再落了一輪狗屎，唯有在超級市場門口稍等，一路在車上仍下著幾大的雨，不過一到達渡假村便開始停雨，所以都可以很順利把所有野運哂上房間。今次所有房間都被安排在山腰，要上一條大斜路，所以每次出入都有一定的運動量。

執拾好行李後，下午四點開始第一課長跑及足球練習，全部人都準時出現，長跑隊圍住渡假村跑左一個圈（也就是十幾年前第一次奪得學界越野賽冠軍的路程），足球隊直落足球場練習。長跑隊跑完步後還到足球場玩馬騮搶波，阿仔都跟住跑了一段，而且也玩得幾開心，六點便一齊去飯堂食晚飯，菜式竟然比預計的好很多，味道好和分量都非常之足夠。夜晚的時間是自由活動，我和亞仔十二點左右便上床訓覺，但係三、四點都重聽到玩的聲音。

第二朝七點長跑練習，竟然差Ｄ全部到齊，還以為個個都唔知醒，跑完步後便到飯堂食早餐，早餐Ｄ質素就一般。之後長跑隊自由活動，足球隊十點半練波。大家吃過午飯後，便再派人出營去買汽水和零食，為夜晚的ＢＢＱ準備，於是便再運了四十幾枝炮彈和大批薯片回來。下午四點的一課長跑練習，超大雨，不過練習繼續，但最擔心還是夜晚的ＢＢＱ。雨一直落個不停，直至ＢＢＱ的時候仍然落著毛毛細雨，幾個大牛龜仍堅持在室外起了一個爐，一邊擔遮，一邊生火；其他人便在室內場起了兩個爐，後來見雨勢開始停下來，便在室外開多個爐燒烤。一直都燒得幾順利，天氣非常之好，完全沒有下雨。燒完行落飯堂食預先定好的糖水，點知行到一半，竟然又再狂風暴雨，直情有紅雨的雨勢，再加埋Ｄ風打橫咁片埋身，唯有停下來避雨，其實還差百幾公尺便到飯堂，但係都要企住避雨，只可以用心掛住Ｄ糖水。廿分鐘後，雨終於停下來，便行落飯堂，不過原來早到的隊員已把糖水打好包，便一齊返回山頂的營舍。這一晚當然是通宵直落咁玩，所以整晚都可以聽到門聲和叫聲，不過都懶理了，繼續大覺訓。

第三日，原定七點長跑練習，結果兩個人出現，其他人仍然昏迷，所以索性取消，讓大家再訓一會。十點半便開始逐間房剷Ｄ人起身，因為十一點半前要辦好出營手續，搞點哂後便一齊到飯堂吃午飯，之後便準備出營。原定叫十架的士來車Ｄ人走，但係Ｄ的士大佬大雞唔食細米，見執得個廿蚊雞，所以都費事來。最後便一齊行番出去，其實只是上一百米斜路便完全是落斜及平路，所以都唔算辛苦，而且很快已經到達巴士站及地鐵站，於是一行人等便各自歸家。

整體來說，成個訓練營都搞得幾成功，有得食、有得玩、有得練，都不失為一個有益身心的暑期活動。

¥¿¦¡©ñ´»°²

Thu, 12 Jul 2007 13:55:50 GMT

今天開始正式放暑假，也是黑色星期五，不知最近傳說的事會否發生。。。

今年已經決定，除了練跑及自己的 duties 外，不會返學校打，一來要慳車錢，二來要接送及陪伴太子去參加活動，基本上星期一、三、五上午要帶阿仔去捉圍棋，下午亦已經 book 哂場和他打羽毛球；星期二、四下午要帶他去練水，夜晚又要去跑步；星期六下午要帶他去學羽毛球；星期日朝又要全家去教堂；其他時間亦要幫手和他溫習及玩耍，所以Ｄ時間已經 full 哂。轉眼已經九年，相信再過多幾年，他便會有自己的朋友陪伴，到時也不再要我了。