六月
當你發現安安靜靜坐下來打篇xanga都變得奢侈時，你便知道那個從前的你已經離你很遠了。
六月好像發生了很多事，又好像甚麼都沒發生過，(咁即係點？) 在我如此思緒混亂之下，我想盡可能把我所想記下來。
關於工作
1)
六月我又返長night，即係只返夜更，過著日夜顛倒的生活，好多人都問我為乜，我想除左因為多果幾千蚊人工之外，還有一些微碎的東西，那些東西藏在你的心內，一時間也想不起來。但我可以肯定的告訴你，不(只) 是因為錢，還有其他。但到後來，我越來越不明白自己，被人不斷地問，日又問夜又問，問到我自己也忘記了是為了甚麼，雖然心底裡知道不(只) 是為了錢，但最後還是選擇直接答別人我貪錢，因為咁樣人地就唔再問下去，而我，又可以得到一個喘息的機會。
2)
月頭工作上有一個小衝擊，事源一晚返工，有一個醉酒疑似黑人物在病房鬧事，他比你高，比你大隻，手臂有你大脾咁粗，佢飲醉酒，失去理性，這從他一句唔好意思之後，下一句就係小你老母中反映出來。佢係病人個仔，病人發生乜事唔係重點，重點在阿仔發顛，與我和另一位男同事發生激烈推撞，而且言語上恐嚇我地。「先生，你冷靜d先！唔好講粗口鬧我地，大家都係想幫你阿爸姐！」「小你老母呀，咁撚串咀呀！我講野不嬲都係咁撚樣，吹呀！你快撚d同我叫我醫生『爛』落黎，即刻呀！」雖然有六個保安在場，但當我被人兇，被人「合」到上心口，被人推撞，他們也只是撓埋雙手，這使我相當無奈，以及無比的Frustrated。
點解唔報警？因為想息事寧人，唔想搞大佢，唔想寫report…
雖然最後阿醉酒仔都離開左，但件事並未有完結！
3) 事情發生後，當晚在場的同事A同同事B分別sick leave左最少五日，只有我如常返工。其中同事A 搞到情緒低落，精神緊張，食唔安坐唔落訓唔著，搞到要睇心理醫生。事情發生後的那個早上，經理主動熱情地招呼那個差點打人的病人家屬，而對於被人「合」到上心口的我與及當晚的其他人，一‧句‧問‧候‧都‧沒‧有！就連一個打來問下你發生乜事既電話也沒有。
4)
很多同事都鬧我，話我做乜唔sick leave？話我唔響應這場工業革命，話我令到其他同事sick leave起上黎無乜公信力，又話果幾千蚊額外allowance出賣左我，唉，事後我真有點後悔。
5)
由於有同事sick leave多日，仲搞到要睇心理醫生，事情驚動到院長個level，醫院要做野。 有乜好做呢？ 諗起都真的有點好笑。一)病房安裝室內無線電話，而放棄原來大大條線果個，咁樣有事發生，你可以渣住個電話四圍走，一路走一路報警，唔駛特登走去打個有線既電話而走唔到。
但係那個室內無線電話外型同手提電話一模一樣，law住佢講正經野被人見到仲以為你著住制服自己講緊私人電話，病人見到話要借電話咁點算，加上鈴聲真係行遠少少都聽唔到…於是用了兩日又用返以前用開果個電話。 二) 就係深夜既時候，醫院大門鎖晒，主要出口有人守著，入醫院要登記，上病房要得到病房人員(即係我地) 批准，防止有人入黎鬧事，又或者有事可以追究。於是，有一晚凌晨一點，有人打黎：「想問你地係咪叫左翠華外賣？有人要送外賣上黎，係咪比得佢入黎？」收線後，我想起史兄那一篇entry，然後笑左好耐。
6) 事情發生後，責任由高層好似玩聽音樂傳波一樣傳來傳去，保安撓埋雙手係因為我地無命令過佢地去阻止。如果你覺得有危險，你應該報警，縱使你既上司唔同意。 因為呢件事而心靈受創去睇醫生就被視為玩野，唔聽話。被人「合」但唔報警就原來係我地唔arm。 被人「合」被人圍，保持高度克制，打不還手，罵不還口，但事後仲被人話你有呢樣不足，果樣不足，聽後真係得啖笑。
7) 我一直等的，就係一個機會。那一夜，他說。
8) 有一句真心話要說的，就是不論有沒有人信也好，那一夜，那一個moment，我是真的覺得好驚。
關於工作的其他事
對不起，我太長氣，講一件事講左8個point。來，講下d輕鬆dd既。
1)
我經常地想，跟我一樣活了這麼多年的人，所走的路竟會距離得這麼遠，踢波既費蘭度托利斯又靚仔又好波，每星期仲賺成百萬港紙，同樣活了這些年來的我卻是如此混混愕愕…那一夜當收到電話話收個同你同樣歲數既人，好自然，你會 一) 留意下佢係咪你舊同學，二) 睇下佢有乜病，然後感慨一番；而當你發現他是 HIV帶菌者，而得到此病竟是因為在大陸叫雞唔帶套？！噢！賣葛！叫雞竟然唔帶套？仲要係大陸？！這簡直比在火星發現有生物存在過的痕漬更不可思議。知道了一切的你，此時只想跟他說：
借問聲你去開邊個場度玩嫁？
2)
早幾日打風，八號風球搭的士本來係「應該」收double，就如同當日份人工一樣，但點解果日司機只係加我十蚊呢？有人說係因為我係醫院上車，加上一個衰樣似足剛剛放工。同事C果日冒著被風吹左去火星的危險堅持上班，仲同師奶爭的士，佢話，當司機聽到佢晨早流流話要去醫院，就問佢：「係咪醫護人員呀，係咪趕返工呀，好，我唔收額外收你錢，快，快上車。」哈，原來咁樣都有福利，由心裡面笑出來。
3)
二月和六月都係返長夜，對比起來，二月，即係新年果排，真係死得人多，也許要死既一早已經死晒。多謝又打風又落雨，令到好多無謂既人無入院，也自然做少左好多無謂既野。
關於朋友
六月，見返好多好耐無見既朋友。有些是一年出來一兩次舊朋友，有些是只不過見了幾次面既網友。談了很多很多，笑了很多很多。
有時候我會想，當中有多少人是可以做一生的朋友呢？
當中又有多少是會忽然失去聯絡呢？
也許最後還是害怕失去。
一個月前到過埃及，在沙漠中想起一個關於沙漠的故事，這裡的萬物以不同的形式生，以不同的形式死，無論多麼不想，都不能夠改變，所有的東西，都總會有一天消失，失去，當中包‧括‧你！千萬年過來，真正活著的，只有沙漠而己。
然後就自然感到莫名的無奈。
感激身邊的每一個，感激肯約我食飯的每一個，感激大家都沒有變，變的只是食物的價錢。
待續...
| 
