好快就到5月勒，08年都好似無乜做過野咁。
今次紐西蘭番黎坐日機，都係第一次坐日頭既長途機，估唔到鬼咁熱鬧。上機無耐，空姐就派午餐，食完無耐，d人就開始周圍貢，企晒起身傾偈，人來人往去機尾攞snack，好似開party咁，係咁見到空姐不停地遞水遞杯麵，就連我隔離一直保持安靜沈穩的可愛小男孩也按捺不住，要撩一撩前面既大眼小妹妹，哈哈，勁可愛﹗
因為無訓覺，所以呢程機覺得特別長。就係咁我同朋友仔就一連睇左四齣電影，真好彩，呢幾套都係我之前想睇，但係無機會睇既戲。如果佢放既電影係我地去個時個list就慘勒，因為好多都已經睇過晒。四套戲分別係 - 追風箏的孩子 (Kite Runner) ; 冒牌伴郎生擒姊妹團 (Wedding Crashers); 留給最愛的情書 (P.S. I Love You); and 神探。唔知係咪係飛機勁近個mon，所以我睇得勁投入，套套都好好睇咁。
特別想講下"神探"，雖然之前都有朋友同我提及過呢套戲講，個時都無留意，睇左覺得佢個題材幾特別。呢套戲講 "每個人心中都有鬼"，而主角劉青雲可以將呢d鬼都visualise出黎，人心中既軟弱、意志唔堅定、智謀立壞心腸、暴力、自私冷皓，佢都會睇到係一隻鬼，所以佢見到殺人犯林家棟夾埋有成7隻鬼。主角係戲中割左隻耳仔送俾佢前上司，佢話"因為大SIR心中無鬼，要多謝佢"。這真的很難，我確信每個人心中都有鬼，總會曾經有一時三刻有過吧。這令我想起孫悟空 (雖然近來有好多新寵，不過我最喜愛既卡通人物還是孫悟空﹗)，以前有一幕印像好深刻，當時孫悟空還是細路仔，同莊子去搵龍珠既時候遇上什麼壞人，壞人唔夠孫悟空打，於是出絶招。這個絶招也夠利害，一出招，只要對手以前曾經有過任何一刻任何形式既邪念，都會即時暴斃。可惜，呢招用於毫無邪念既孫悟空，一d反應都無，壞人對手當然當場嚇呆了，怎麼可能世上會有人從無邪念呢？﹗記得當年我年紀也真的很小吧，有這樣深刻的印象，大慨係我覺得如果有人用這一招對小妹身上，也就必死無異……被嚇怕了，哈哈。要知道年紀小的我是很努力地希望要做好人不容許自己有壞念頭，當然而家都會咁諗，畢竟年紀大了，有心也只能盡量做吧……
套戲最後結局並不如意，我鍾意睇戲有happy ending，呢套戲個結局絶對唔係我杯茶，但係那結局寫實得發人深省，加上劉青雲最後既眼神，足以係我腦海中凝繞良久不散。究竟結局係咩？自己看吧。
Chatboard (0)