Lucky Cat!有的主人就是可以咁無良， 將自己的貓咪遺棄係梯間， 由得牠擔驚受怕，痛苦捱餓。可以肯定不是走失的，看更在附近層數拍門問過都無人認，已經幾天了，又沒有人搵貓，最後漁農處把牠捉走了。 這是我媽在上星期二見到的，她只見漁記間車，連貓咪的模樣也沒見過，只是問看更才知道。第二日我問了看更，但你知道啦，看更都上了年紀，所有貓對他們來說都是同一隻貓，根本不太能說出那隻可憐貓咪的特點，只告訴我貓咪看似有病，因總是靜靜的，無心機咁縮埋一角。 第三日我就入管理處問該處的小姐有沒有給貓咪拍照，好在有!!一看圖片就知道不是流浪貓，似似地名種貓，個樣都唔似有病，眼神都幾精靈，流浪左咁多日都仲有咁既樣應該都唔會係有病。由於任何動物被漁記捉左，4日後無人認領就會 “人道”毀滅，我打算贖佢出來再搵人收養，咁靚既貓要搵到人收養應該無咩問題。 
於是我同媽咪就展開贖貓之旅，先打俾漁記話我走失左隻貓俾佢地捉左，再出發去上水接佢，過程都好順利，真貓靚過影相，對眼仲大過我家 “妹妹”, 我地坐的士去石湖墟睇獸醫，初時去維多利的，但full booking，唔俾walk in，該位姑娘指導我地去前d個間，我地找了一會就找到那間 “北區動物診所” ，醫生說牠應該是挪威森林貓，1歲，男仔，未絕育，表面看來健康良好，唔似有病。診症時有位姑娘對牠一見鍾情，我就話不如由你收養啦，橫點遲d都要搵佢搵新主人，與其交俾網上d三唔識七既人，交俾診所姑娘就最放心，起碼佢有咩病痛，都一定有醫生睇。姑娘答應了，結果那隻曾經被人遺棄，流落漁農處徘徊生死邊緣的可憐貓咪，極速半小時內就找到新主人了，這真是最最最完美的結局! 
我覺得所有野都係冥冥中有主宰, 整定既~~
如果唔係維多利full booking我都唔會去呢間，我連地址/診所名都唔知， 咁0岩個時又無人睇，(睇完出來已有3-4位客人等緊了)，咁0岩姑娘又對貓咪合眼緣，有咁正既happy ending我真係發夢都無想過!!
而我之前所擔憂的， 已變得多餘了~呢兩日我個心十五十六，男友唔建議我贖佢出來，怕我搞唔掂， 但自己個心又唔安樂。由知佢被捉走開始，第一日我都可以無咩野，第二日就忍唔住勁問看更那隻貓咪資料，第三日如果仲唔行動就會坐立不安， 第四日如果仲唔行動我想我會內咎死。 好多謝媽咪，次次開頭佢都反對，話' 呢個世界咁多隻，你幫得邊隻呢?" ，但最後佢都會俾我行動，甚至協肋我去救貓貓，她是一個口硬心軟的人呢~~ 我知，呢個世界咁多動物，我無可能幫得0西，見一隻幫一隻都難，但我相信俾得我遇到，如果你唔幫就根本無人會去幫佢，一係幫 ，一係由得佢死，我覺得都可以試下幫，雖然最後結果未必係好，但總叫盡左力，可以無憾。 | 
