| ~運氣~
今日考Medicine 1 o既OSLER (Long case exam)~ 全靠平時做得多善事, 今日考試撞到個病人異常地合作!!! 我平時睇o既病人都無佢咁合作! haha~
佢有一個好長o既病歷~ 高血壓, 糖尿病, 缺血性心臟病做過搭橋手術, 前列腺問題同埋痛風症, 每一樣都花左好大段時間去問, 都仲未問到入正題 --- 流鼻血...
好彩~ 呢個75歲o既伯伯好好人, 我問佢高血壓同糖尿病控制成點, 佢即刻拎左本記事簿出黎俾我睇佢控制成點, 食左D咩藥~ 問都唔洗問已經一目了然!!!
當我問佢做乜事入院~ 佢即刻拎左第二張紙俾我睇! 寫住: 薄血丸要注意事項! 顯而易見... 係薄血丸搞唔掂整到伯伯流鼻血... 花左二十分鐘終於問完個病歷~ 再做埋少少檢查~ 搞掂!!! hehe~
完左之後我同學同我講... 佢考試撞到o個個病人係講鄉下話........ 大鑊!!!!!!
考試好講o既係運氣...
|
| |
| ~老翻~
頂~ Cinde前幾日同我講佢o係facebook度search我個名諗住click入去我個profile, 點知除左見到正版o既Zenon Yeung (CUHK)之外, 仲見到個Yeung Zenon!!! 佢以為有咁o岩得咁橋同名同姓je... 點知o個個人幅profile picture係我幅相!!! 仲要poorly trimmed! 見到安怡一半塊面添!!!
咁我諗住click入去睇下邊個咁無良扮我... 點知當我click入去睇佢D friends o既時候, 佢D friend全部都係男人!!!!!!! 你好搵唔搵, 你搵我個名同我幅相去厄男仔???!!!! 你厄女仔我都嘗試體諒你, 你走去厄男仔???!!! 仲要pathetically!!!!!! 厄得o個十幾個... 問你死未!
唔該... 你要搵同性伴侶, 唔該搵個第二個人黎扮, 唔好搵我黎扮... 我自問唔吸引~
我亦都覺得你好lorrr... 俾我發現左...
所以舉勸大家!!! 記住o係facebook search下自己個名睇下有無俾人盜用!!!
而呢個Yeung Zenon, 經過我寫左篇千字文去facebook之後終於被剷除...
|
| |
| ~人不可以貌相~
上個禮拜我番到醫院, 無乜表情o既盧醫生問我書... 佢問我咩係OAD~ 我唔識... "咁PPAR-gamma呢?" 我同大隻佬兩個都呆左... 佢繼續問"咁GLP聽過喇掛?" "Somogyi effect呢咁?"
佢問十句我地一句都答唔到...
自此之後, 我問佢"有無D咩case可以睇呀?"
盧醫生: "無!"
我硬著頭皮繼續問 "咁我地有D咩可以做???"
盧醫生斷然咁答我 "番去溫書囉! 你地底子好差呀!"
如是者, 我好一陣子都唔敢問佢野~
尋日我面矇矇咁問佢"D心律不正好亂呀~ 我睇書越睇越亂都唔知應該點算"
盧醫生今次同我地傾左好耐! 佢話"咁呀~ 要搵人講解下先得喎~ 搵日啦咁~ 我而家唔得閒!" 我以為佢只係敷衍我地幾句! 點知轉個頭盧醫生竟然番黎捉左我同大隻佬入間房度詳盡講解! 仲Show佢張中大教職員証俾我地睇~ haha~ 佢話逗左中大人工唔可以唔睬我地~ haha~
臨走o既時候佢再一次嘲笑我地~ "乜你地D professor無教你地o既咩? 乜都唔識o既?"
我唯有將個實情講佢聽 "佢地教D野好深... 好似教緊外語咁... 聽唔明!"
平時無表情o既盧醫生突然間好搞笑咁寸我 "你即係dull個圈黎話我講野膚淺啦???!!!"
haha~ 再一次俾佢拋窒左!!!
平時無表情o既盧醫生原來個人都幾好笑~
|
| |
| ~信任。責任~
今日走過病房, 同一個五十幾歲o既叔叔傾偈~ 佢咳左半年, 近排發現條頸有舊野, 而且越黎越大~ 而家已經有5cm X 5cm~ 個叔叔因為唔想食西藥~ 所以一直都只係睇中醫, 中醫師話佢o既症狀似係肺癆, 應該無咩大礙~ 但係舊野越黎越大, 近排仲搞到聲沙~ 呢幾日連吞野都有困難要靠胃喉食野~
我地今日見佢o既時候... 叔叔仲堅持醫師同佢講只要調理下身子, 就連六個月藥都唔洗食就可以醫好肺癆~ 但係眼前o個舊大得咁快o既lump, 點可能係肺癆...
據估計, 叔叔可能患左肺癌或者Lymphoma... 而家抽左組織等緊做化驗.
真係好驚第時斷錯症o個個係我... 而誤診o既代價係一個好好先生o既生命...
|
| |
| ~Taking blood~
尋日我同大隻佬o係醫院無乜野做, 就走左去幫D抽血姑姑抽血~
我抽抽下血隔離個阿婆無端端大叫"ARGHHHHHH!!! 好痛呀好痛呀!!!!!!"
幫佢抽緊血o既大隻佬即刻呆左! 拎住支針同個阿婆講"我都未拮落去! 咁快就痛???!!!"
阿婆之後好浮誇咁同我地講"無呀~ 我想哎下之嘛!"
之後就繼續大叫"ARGHHHHHH! 好痛呀好痛呀~"
大隻佬俾阿婆嚇呆左~ 唔敢落針~ 隻手猛咁o係度震...
傻更更o既阿婆見玩大左~ 就乖乖地咁話"你咁驚我最多咪唔叫囉~" 之後個阿婆真係好乖咁俾大隻佬抽血~ 抽完血仲好有道理咁同我地講"唔洗唔該~ 你幫我, 我幫你姐~~~"
haha~ 咁o既阿婆都有~ 第時人地幫我抽血, 我又咁樣嚇下佢先~ hehe~
|
| |
